ഇന്ന് മിക്കവരിലും കണ്ട് വരുന്ന പ്രശ്നമാണ് തൈറോയിഡ്. കൂടുതലും സ്ത്രീകളിലാണ് കണ്ടുവരുന്നത്. പലകാരണങ്ങള് കൊണ്ടാണ് തൈറോയിഡ് ഉണ്ടാകാം. കഴുത്തിലെ തൈറോയിഡ് ഗ്രന്ഥിയുടെ പ്രവര്ത്തനം അവതാളത്തിലാകുമ്പോഴാണ് തൈറോയിഡ് വരുന്നത്. രണ്ടുതരത്തിലാണ് തൈറോയിഡുകളുള്ളത്. ഹൈപ്പര് തൈറോയിഡ്, ഹൈപ്പോ തൈറോയിഡ് എന്നിങ്ങനെയാണ് രണ്ടു വിധം. ക്ഷീണം, അലസത, അമിത ഉറക്കം, അമിതഭാരം, മലബന്ധം, ആര്ത്തവത്തിലെ ക്രമക്കേടുകള് എന്നിവയെല്ലാം തൈറോയിഡിന്റെ പ്രധാന ലക്ഷണങ്ങളാണ്. ഹൈപ്പര് തൈറോയിഡിസത്തില് ശരീരം മെലിഞ്ഞുവരിക, ക്ഷീണം, നെഞ്ചിടിപ്പ്, വിയര്പ്പ്, വിശപ്പ്, കണ്ണുകള് തള്ളിവരിക, ഇതെല്ലാം പ്രധാന ലക്ഷണങ്ങളാണ്. ശബ്ദത്തിലെ വ്യതിയാനം, ചുമയും ശ്വാസംമുട്ടലും, ഭക്ഷണമിറക്കാന് തടസം ഇതെല്ലാം തൈറോയിഡ് ഗ്രന്ഥി വീക്കത്തിന്റെ ലക്ഷണങ്ങളാകാം. ഇവയില് ശ്രദ്ധിക്കേണ്ട ചില കാര്യങ്ങളുണ്ട്.
വൈറ്റമിന് ഡി
വൈറ്റമിന് ഡിയുടെ കുറവ് തൈറോയിഡ് പ്രശ്നത്തിനു വഴിയൊരുക്കുന്ന ഒന്നാണ്. പ്രത്യേകിച്ചും വൈറ്റമിന് ഡി 20ല് താഴെയാണെങ്കില്. ഇത്തരം ഘട്ടങ്ങളില് തൈറോയിഡ് ആന്റിബോഡി ഉല്പാദനം വര്ദ്ധിക്കും.
കെമിക്കലുകളെ സൂക്ഷിക്കുക
ചില പ്രത്യേക കെമിക്കലുകള് തൈറോയിഡ് ഗ്ലാന്റിന്റെ ഉല്പാദനം കുറയ്ക്കും. ആന്റിബാക്ടീരിയല് സോപ്പിലും ടൂത്ത്പേസ്റ്റിലും കാണുന്ന ട്രൈക്ലോസാന്, പ്ലാസ്റ്റിക്കില് കാണുന്ന ബിസ്ഫിനോള് എ, കാര്പെറ്റ്, ഫാബ്രിക് എന്നിവയില് കണ്ടു വരുന്ന പെര്ഫ്ളൂറിനേറ്റഡ് കെമിക്കലുകള്, നോണ് സ്റ്റിക് പാത്രങ്ങളിലെ കോട്ടിംഗില് കണ്ടു വരുന്ന ചില കെമിക്കലുകള് എന്നിവയെല്ലാം തൈറോയിഡ് ഗ്രന്ഥിയുടെ ആരോഗ്യം നശിപ്പിക്കും.
അയൊഡിന് ഭക്ഷണങ്ങള്
ശരീരത്തില് വേണ്ടത്ര അയൊഡിന് ഉണ്ടെന്ന് ഉറപ്പു വരുത്തുക. ഇത് തൈറോയിഡ് വരാതെ തടയാനുള്ള പ്രധാന വഴിയാണ്. ഭക്ഷണത്തിലൂടെ നിങ്ങളുടെ ശരീരത്തിലെത്തുന്ന അയൊഡിനാണ് തൈറോയിഡ് ഹോര്മോണ് ഉല്പാദനത്തിനു സഹായിക്കുന്നത്. അയൊഡിന് അടങ്ങിയ ഭക്ഷണങ്ങള് കഴിക്കാന് ശ്രമിക്കുക.
പുകവലി നിര്ത്തുക
സിഗരറ്റിലെ തയോസൈനേറ്റ് തൈറോയ്ഡ് ഗ്രന്ഥിയെ നശിപ്പിച്ചു കളയും. പുകവലി തൈറോയിഡ് വരുത്തുമെന്നു മാത്രമല്ല, തൈറോയിഡ് ചികിത്സകള് ഫലിക്കാനും ബുദ്ധിമുട്ടുണ്ടാക്കും.
സോയ ഒഴിവാക്കാം
സോയ പോലുള്ള ഭക്ഷണങ്ങള് കഴിക്കുന്നുണ്ടെങ്കില് നിര്ത്തുക. സോയ അടങ്ങിയ ഭക്ഷണങ്ങള് തൈറോയ്ഡ് പ്രവര്ത്തനത്തെ താറുമാറാക്കുന്ന ഒന്നാണ്. തൈറോയിഡ് ഹോര്മോണ് ഉല്പാദിപ്പിയ്ക്കാനുള്ള ശരീരത്തിന്റെ ശേഷിയെ തകരാറിലാക്കുന്ന ഒന്നാണ്.
വെളിച്ചെണ്ണ
ഹോര്മോണിന്റെ ഉല്പാദനം കൂടുന്നതാണ് ഹൈപ്പര് തൈറോയിഡിസത്തിന് കാരണം. ഹോര്മോണിന്റെ ഉല്പാദനം കുറയ്ക്കാന് സഹായിക്കുന്നതാണ് വെളിച്ചെണ്ണ. അതിനാല് ഹൈപ്പര് തൈറോയിഡിസമുളളവര് വെളിച്ചെണ്ണ ഭക്ഷണത്തില് ഉള്പ്പെടുത്തുക.
സെലേനിയം
സെലേനിയം എന്ന ഘടകത്തിന്റെ കുറവ് തൈറോയിഡ് ആന്റിബോഡി ഉല്പാദനം വര്ധിപ്പിക്കുന്ന ഒന്നാണ്. ഇതുവഴി തൈറോയിഡ് ആരോഗ്യത്തെ വിപരീതമായി ബാധിക്കുകയും ചെയ്യും. സെലേനിയം അടങ്ങിയ ഭക്ഷണം കഴിക്കുക.
പഴങ്ങളും പച്ചക്കറികളും
ഹൈപ്പോ തൈറോയിഡിസം തടയാന് ഏറ്റവും നല്ലതാണ് പഴങ്ങളും പച്ചക്കറികളും. പച്ചക്കറികളില് ധാരാളം അയഡിന് അടങ്ങിയിട്ടുണ്ട്. അതുപോലെ തന്നെ നാരുകള് ധാരാളമടങ്ങിയ ഇലക്കറികളും പഴവര്ഗങ്ങളും പച്ചക്കറികളും കഴിക്കുന്നതും തൈറോയിഡ് രോഗികള്ക്ക് നല്ലതാണ്.
