ആഹാരത്തിന് രുചിയും മണവും പ്രദാനം ചെയ്യുന്ന കറിവേപ്പിലയ്ക്ക് ധാരാളം ആരോഗ്യ ഗുണങ്ങളുമുണ്ട്. അതുകൊണ്ടു തന്നെ നാട്ടുവൈദ്യങ്ങളിലും ഒറ്റമൂലികളിലും കറിവേപ്പില ഒരു മുഖ്യ സാന്നിധ്യമായിരുന്നു. നേത്രരോഗങ്ങള്, മുടികൊഴിച്ചില്, വയറു സംബന്ധിയായ രോഗങ്ങള് എന്നിവയ്ക്കെല്ലാം കറിവേപ്പില ഉത്തമമാണ്.
കറിവേപ്പിലയിട്ട് കാച്ചിയ എണ്ണ തേച്ചാല് തലമുടി തഴച്ച് വളരുകയും മുടിക്ക് നല്ല കറുപ്പ് നിറം ലഭിക്കുകയും ചെയ്യും.തലമുടി കൊഴിച്ചില് തടയുന്നതിനായി കറിവേപ്പില, കറ്റാര്വാഴ, മൈലാഞ്ചി എന്നിവ ചേര്ത്ത് എണ്ണ കാച്ചി തലയില് തേക്കുക.
ദഹനത്തിനും, ഉദരത്തിലെ കൃമി നശീകരണത്തിനും വിറ്റാമിന് ‘എ’ കൂടുതല് അടങ്ങിയ കറിവേപ്പില കഴിക്കുന്ന ഭക്ഷണത്തില് ഉള്പ്പെടുത്തുന്നത് വളരെ നല്ലതാണ്.ചര്മരോഗങ്ങള് ഇല്ലാതാക്കാന് കറിവേപ്പിലയരച്ച് കുഴമ്പാക്കി പുരട്ടിയാല് മതി.
ഇറച്ചി കഴിച്ചുണ്ടാകുന്ന ദഹനക്കുറവിന് ഇഞ്ചിയും, കറിവേപ്പിലയും അരച്ച് മോരില് കലക്കിക്കഴിക്കുക.കറിവേപ്പിലക്കുരു ചെറുനാരങ്ങാനീരില് അരച്ച് തലയില് തേച്ച് അരമണിക്കൂറിനു ശേഷം കുളിക്കുക. ഇതുവഴി പേന്, ഈര്, താരന് എന്നിവ നിശ്ശേഷം ഇല്ലാതാകും.
അലര്ജി സംബന്ധമായ അസുഖങ്ങള് ശമിപ്പിക്കാന് കറിവേപ്പിലയും മഞ്ഞളും കുടിയരച്ച് തുടര്ച്ചയായി ഒരു മാസത്തോളം രാവിലെ കഴിച്ചാല് മതി.പാദങ്ങളുടെ സൗന്ദര്യത്തിന് പച്ചമഞ്ഞളും കറിവേപ്പിലയും ചേര്ത്തരച്ച് തുടര്ച്ചയായി മൂന്ന് ദിവസം കാലില് തേച്ച് പിടിപ്പിക്കുക. അതുവഴി ഉപ്പൂറ്റി വിണ്ടുകീറുന്നതും മാറിക്കിട്ടും.
കഴിക്കുന്ന ഭക്ഷണത്തില് പതിവായി കറിവേപ്പില ഉള്പ്പെടുന്നത് കണ്ണിന്റെ ആരോഗ്യത്തിന് വളരെ നല്ലതാണ്. വിറ്റാമിന് ‘എ’ ധാരാളം ഉള്ക്കൊള്ളുന്ന ഇലക്കറിയാണ് കറിവേപ്പില. അതുകൊണ്ടാണ് നേത്രസംബന്ധമായ അസുഖങ്ങള്ക്ക് ഫലപ്രദമായിരിക്കുന്നതും.
അരുചി മാറിക്കിട്ടാന് കറിവേപ്പിലയരച്ച് മോരില് കലക്കി സേവിക്കുന്നത് ഫലപ്രദമാണ്.കറിവേപ്പിലയരച്ച് പൊളിച്ച അടക്കയോളം വലുപ്പത്തില് ഉരുട്ടി കാലത്ത് ചൂട് വെള്ളത്തില് ചേര്ത്ത് കഴിച്ചാല് അമിത കൊളസ്ട്രോള് മൂലമുണ്ടാകുന്ന അസുഖങ്ങള്ക്ക് ശമനം കിട്ടും.പുഴുക്കടി അകലാന് കറിവേപ്പിലയും, മഞ്ഞളും ചേര്ത്തരച്ചിട്ടാല് മതി.
